قصيده الاربعين

ابأربعينه إعلـــه الاخو ابحسره أريــد اوصــل وشوف ابيــا كتر كبره

فاركتـــه اوتركتــــــه اموسّد التربان
مـحزوز النحــر مـتـــوســط الميدان
تدوس اخيول اميّه اوتسحك الجثمان
وصحابـــــه اوهلـــــه متمدّده ابكتره

إجينه امحمّليــن اعتاب الـه اوشكوه
أريــد اوصـــل وذكره ابجلمة الخوّه
وكلـّه مـــن تـــركتـــــك والله بالكوّه
روعنــــــي الدعـــي وتيسّرت بمره

يحسيــــن الوكـــت مــال اوفتك بيّه
اويهد اكبر جبـــل ظيم الجره اعليّه
جنـــت امخدّره اوصبـّحـــت مسبيّه
إوفكد كلبي الصبر يوم الفكد خدره

يــا خويـه اوحياتك مـا غفت عيني
كلمـا سلهمــــت ذكـــرك يصحيني
وحك جلمـــة الخـوه البينك اوبيني
مثلك خاطــري حــز العــدو نحره

إجيـــت انـشـــد عليهـــم ويــن خوّاني
بلكــي ابشوفـــة اهلـــي ايخفن احزاني
آنـــه ام الحـــزن والدمعــــه عنـــواني
اوكلبي اعله المحن محـّد صبر صبره

حاجيــــت الحده ابضعني اوسره بيـنه
اوكلفـتـــه يـمـــر بكبــــور اهـــــالينه
اومــــن شفنه الطفوف ابحركه نادينه
يهـــل الــزود اجتكـــم زينـــب الحرّه

وصلــت الكبر اخــوي اوكرّة اعيوني
وصحت يحسين فكدك خيـّب اضنوني
عكبـك يــــا بطل عدوانـــي هظموني
اوليـــل الهــم تمــاده اوما بزغ فجره

اوصحــت عمـّه يـــبـــو البــاقر أريدنـّك
توصلـّنـــي الأخـــوي ابـــن الفحل عمـّك
شفت كبره اوصحت خويه اوصلت يمـّك
يــبـــو فـــاضـــل تـلكـّه اوديعـة الزهرة