معانات الشيعه في البقيع

بسم الله الرحمن الرحيم

اللهم صلي على محمد وآل محمد

(( يا أبا صالح أدركنا ))

**

اليمتى ياابن الزهره مو ضاق الصدر .. من فعايل هاي أزلام الكفر
**
اليمتى يانسل النبي الهادي الشفيع .. انكابد الآلام بالحال الفظيع
من نريد انزورن اقمار البقيع .. انضوقن المر من حثالات العصر
**
انضوقن المر سيدي و تبدي الجراح .. من فعايل ذوله أولاد السفاح
اعلينه يالوالي يشهرون السلاح .. من نِرَفْع اچفوفنه اقبال القبر
**
الحالنه يالغايب ايلين الحديد .. من قريب انزور , لا بل من بعيد
اقبال لقبور اضحى واقف چم يزيد .. و چم ابن مرجانه شفنه و چم شمر
**
صرنه بس انزور من خلف السّياج .. و ذاك احوم اقبالنه امرعّي النِّعاج
و من نصلي اعلى النبيّ اعلينه هاج .. حتى هاي اضحت يبو صالح كفر
**
من نصلي اعلى النبي ايسكتونّه .. و هي جريمه البيهه يتّهمونّه
صدّق ابهاي اضحوا ايسجنونّه .. واحنه امچلبين بزمام الصبر
**
مايريدونه نصلي اعلى الرسول .. و من نناشد وين چا قبر البتول
محّد ايجاوب ولا واحد يقول .. و عالسؤال النطرحه كل من يفر
**
بالبقيع انظل يغايبنه ندور .. و من محاجرنه مدامعنه تفور
من نشاهد سيدي ذيچ القبور .. ابحاله يالموعود ابداً ماتسر
**
لا قبب لا أضرحه و لا من علم .. و لا مناره اعلى قبور اهل الشيم
هدّموهه المارعوا سيد الأمم .. و فعلوِ الما فعلته اهنود الحمر
**
سيدي و مولاي يالحق المبين .. و بس نصد العند قبر ام البنين
وقفوِ ايصيحوا النه يامشركين .. هاي ماتنفعكم و لا ماتضر
**
آه ياحسرة قلبنه المنفجع .. آه من هالقول صب دم يادمع
اشلون أم عباس مابيهه نفع .. حاشى والله و هي ملاذ المنكسر
**
انحلفك ابرقبة أبو اليمه الذبيح .. اتخلي ادموم اليعادونه تسيح
و تبني اعلى اقبور أيمّتنه الضريح .. و قبه منّ الذهب تزهي ابكل قبر
**
اليمتى ياابن الزهره مو ضاق الصدر .. من فعايل هاي أزلام الكفر
بيدنه الأشفار والكل ينتظر .. ساعة البيهه يطر ذاك الفجر
بيدنه الأشفار والكل ينتظر .. ساعة البيهه يطر ذاك الفجر